اصحى
يا دنيا وقومى يا دنيا واسمعى ديك الصبح صديقك
خدى مـ الكزرونة الألمونية لبن الصبح وغيرى ريقك
اصحى يا دنيا وقومى يا دنيا والبسى واتزوقى تزاويقك
وامشى ورشى علينا كولونيا وخدينا معاكى ف طريقك
لما الصبح بيفرش نوره يصحوا ولاد الأرض يدوروا
النمل يحازى ف طابوره ويعبى ويشيل ف جحوره
والموج يتمطع ف بحوره والبوبى يعضعض ف فطوره
والنحل يدور وسط زهوره واسقيه يا زهور من تفاريحك
فرش النور ع الأرض وغطى بطبوط كاكا لمامته البطة
من أول ندهة قامت نطة وبسرعة حضرت الشنطة
باس مامته ع العتبة وخطى شاف القطة فوق البسطة
حتنونوله جالها زغطة قال اشربى وانتى يروح ضيقك
سوا سوا رايحين على مدارسنا حاضنين ف كتبنا وكراريسنا
على آخر السلم بسبسنا جالنا البوبى عليه ملسنا
ومشينا بغنوة تونسنا وتنشطنا وتحمسنا
بالفضل فتحنا اتشمسنا وسمعنا يا عصافير زقازيقك
ليست هناك تعليقات:
إرسال تعليق